நான் ஆசிரியரானால்… பள்ளிச் சிறார்க்கு உரிய மேடைப்பேச்சு

 என் அன்பின்  ஆசிரியர்க்கு முதல் வணக்கம் 

நான் ஆசிரியரானால்...

தாய் மண்ணின் வருங்கால வாரிசுகளை உருவாக்கும் பொறுப்பைத்

திறம்பட ஏற்று நடத்துவேன்.

செய்யும் தொழிலே தெய்வம் என்னும் பொன்மொழிக்கேற்ப;

அத் தொழிலைப் புனிதமானதாகக் கருதிச் செயலாற்றுவேன்.

கண் போன்ற கல்வியை மாணவர் உலகம் முழுவதும்;

சாதிமத வேறுபாடின்றிப் பெற்றிட வழிவகை செய்வேன்.

நம் இதிகாசங்கள் காட்டும் துரோணாச்சாரியார் போலவோ;

                                                   பரசுராமர் போலவோ

பிறப்பால் உயர்வு,தாழ்வு பாராட்ட மாட்டேன்.

ஏற்றத் தாழ்வின்றிக் கல்வியை எல்லோரும் பெறும் வண்ணம்

திட்டங்கள் தீட்டுவதோடு மட்டுமின்றி; அவற்றைச் செயலிலும் காட்டுவேன்.

காசுக்குக் கலை வாங்கும் நிலை போல;

காசுக்குக் கல்வியை வாங்கும் நிலை இன்றைய சமுதாயத்தில் பெருகியுள்ளது.

இந்த அவலம் அபாயகரமானது.

முளையிலேயே கிள்ளி ஏறிய வேண்டிய நச்சு.

நான் ஆசிரியரானால் கல்வித்துறையின் மேலிடத்தோடு;

இந்நிலை நீங்கப் போராடுவேன்.

ஆங்கிலேயர் வகுத்த கல்வித்திட்டத்தால் இருநூறு ஆண்டுகளாக; 

எழுத்தர்களை உருவாக்கிய அவலநிலை

இன்னும் நம் நாட்டை விட்டு நீங்கவில்லை.

கல்வித்திட்டம் மாறி;

கற்றவர் தரம் ஓங்க;

பள்ளிக்கூடம் முதல் மாணவர்க்குத் தொழிற்கல்வி பயிற்றுவிக்க...

வழிவகை செய்வேன்.

தலைசிறந்த ஆசிரியர்; மாணவர் உள்ளம் கவர்ந்த உத்தமராகத் திகழ்வார்.

மாணவர் மனம் கவர;

அவர்கள் மனம் போன போக்கில் கல்வியைத் தவிர்ப்பது தக்கது அல்ல.

வேம்பும் கடுவும் கசந்தாலும் மருந்தாய் அமைவது போல;

மாணவர்களைக் கட்டுப்பாட்டிற்கு உட்பட்ட அன்பில் நெறிப்படுத்துவேன்.

கல்வி வளாகத்திற்குள்...

மாணவர்க்குப் பெற்றோர் போன்ற உறவு நிலையை உருவாக்கிக் கொள்வேன்

பொதி சுமக்கும் கழுதைகள் போல்;

மாணவரைப் புத்தகச்சுமை தூக்க வைக்காமல்;

அறிவுச் சுமையை அவர்கள் சிந்தையில் ஏற்றுவேன்.

மனப்பாடத் திறனைப் பெருக்குவதே தலையாய கடன் என்று கருதாமல்;

சிந்திக்கத் தூண்டுவதும்;

அறிவைப் பெருக்குவதுமே கல்வியின் நோக்கம்...

என்ற கொள்கையோடு பணி புரிவேன்.

கூடுதல் மதிப்பெண் பெறுவதே குறைவற்ற கல்வி...

என்ற தவறான கொள்கை பரவிவரும் இக்காலத்தில்;

மதிப்பெண்கள் அறிவுத் திறனுக்குரிய அளவுகோலாய் அமைவதில்லை...

என்பதைப் புரிந்து செயல்படுவேன்.

பிறர்க்கும் புரிய வைப்பேன்.

புத்தகப் புழுக்களாய் மாணவரை மாற்றாமல்;

செயல் திறன் மிக்கவர்களாய் உருவாக்க;

அவர்களது முழுமையான ஆளுமையை மேலோங்க வைப்பேன்.  

ஆசிரியத் தொழில் என்றாலே; சம்பள உயர்வு கேட்கும் சாரமற்ற தொழில்...

என்ற தவறான கருத்து நிலவுகிறது.

அதை மாற்றி அத்தொழிலின்  புனிதத்துவத்தை நிலைநாட்டுவேன்.

                                            ‘என் கடன் பணி செய்து கிடப்பதே’

என்ற கொள்கையோடு;

செய்யும் தொழிலைத் தெய்வமாகக் கருதி;

உன்னதமான ஆசிரியர் என்று பெயரெடுக்க முற்படுவேன்.

                                                                     நன்றி

                                                                  வணக்கம்